Hoksebarge krig ne busse op bestelling in plaats van de vaste buurtbuslijn

Wel vanof moandag 2 november in Hoksebarge met et openbaar vervoer de gemeente deur wil, boekt eerst. Dan vangt flexRRReis an: nen busdienst zoonder vaste weg en zoonder dienstregeling. De achtpersoonsbusjes riedt op wearkdage van zeuvn uur ’s morns töt zeuvn uur ’s oavns en doot zoowat 110 haltes binnen de gemeentegrenzen an.

flexRRReis kump in de plaats van de buurtbus van Buurse noar et centrum van Hoksebarge. Dee har aait de zölfde weg, mer flexRRReis bestrijkt zoowat de hele gemeente en geet alleen as der ritten besteld bint. Vervoerder Arriva en de verening Buurtbus Buurse-Haaksbergen hebt et tehope opzet. Oonderwegns könt aandere reizigers in- en oetstappen, zolang dat gen gevolgen hef vuur’n ofsproken aankomsttied.

De chauffeurs wet wel der instapt

Vuur de vrijwillige chauffeurs verandert der wat wezenlijks: ze riedt nich langer ne ronde en hopt dat der iemand biej de halte steet. “De chauffeurs zijn nu verzekerd van reizigers”, zeg Ton Wolf, vuurzitter van Buurtbus Buurse-Haaksbergen, in’n bodbreef van de gemeente. Volgens em wordt reizen op dizze manier aantrekkelijk vuur meer leu.

Wethouder Johan Niemans, dee oaver mobiliteit geet, hef et oaver de verbindingen binnen de gemeente dee der eerder nich warn. “Dit maakt dat onze inwoners zich binnen Haaksbergen gemakkelijker kunnen verplaatsen”, loat he wetten. Et college wil dat stimuleren en zoargt doarum oonder meer vuur geschikte haltes.

Reserveren en betalen

Nen rit bestellen kan via’n app van Arriva of per tilfoon. Reizigers gevt deur hoo laat ze weg wilt of wanneer ze ergens wean wilt. Umdat et systeem alle geboekte ritten töt één weg samenvoegt, kan et vertrek töt ’n kerteer ofwieken van de gevroagde tied. Hoo laat de bus krek vertrekt, volgt via’n app of per sms.

Betalen doot iej biej’n chauffeur, met nen bankpas of ne OV-chipkaart. Nen rit kost € 2,50. Groepen töt acht personen könt met. De busjes bint toegankelijk vuur reizigers met nen rolstool, zelfstandig of met begeleiding.

Hoo iej nen rit bestelt, steet op rrreis.nl/flex. Bellen kan ok, op 085 - 20 85 212.